தொலைநோக்குப் பார்வையுடன், மக்களை முன்னிலைப்படுத்தி , சமூகம் மற்றும் பொருளாதாரத் தளங்களில் பெரும் முன்னேற்றம் காண வேண்டும் என்பதே மக்கள் நீதி மய்யத்தின் நோக்கம். மக்கள் நீதி மய்யம் , இடதும் இல்லை; வலமும் இல்லை. ஒவ்வொரு முக்கிய பிரச்சனைகளின் வேர் வரை சென்று , ஒரு நடுநிலைப் பார்வையோடு அவற்றைத் தீர்ப்பதற்கான வழிகளை வகுப்பதே மய்யத்தின் குறிக்கோள்.

ஒரு நல்ல அரசின் கடமை, மக்களுக்காக , மக்களின் குரலாக செயல்படுவதோடு மட்டுமல்லாமல், மக்களையும் பங்குபெற செய்வதே! மக்களின் தேவைகளும் உரிமைகளும் மக்கள் நீதி மய்யத்தின் இரு கண்கள். தன்னிறைவே மய்யம் . இதுவே CENTRISM என சொல்லப்படும் மய்யக் கொள்கை.

தமிழ்நாட்டை, இந்தியாவின் வரைபடத்தில் , வளர்ச்சியின் குறியீடாகப் பதிக்கத் தேவையான கல்வியும் திறன்மேம்பாடும் முதன்மை முயற்சிகளாக மக்கள் நீதி மய்யத்தின் திட்டங்களில் இடம்பெற்றுள்ளன.
​

மய்யவாதம் என்பது மிதவாதம் அல்ல. 
வலிமை, பாரம்பரியம், வெளிப்படைத்தன்மை ஆகியவற்றிற்கு வலு சேர்க்கும் சிந்தனையே மய்யவாதம்.

சித்தாந்தத்தின் அடிப்படையில் மட்டுமல்லாமல் ஆதாரங்களின் அடிப்படையிலும் கொள்கை உருவாக்கம் செய்யும் சிந்தனையே மய்யவாதம். மய்யவாதிகள், தன்னிச்சை சிந்தனையாளர்கள். எண்ணச் சுதந்திரம் கொண்டவர்கள். 

எந்த ஒரு பிரச்சனையையும், நியாயம், சாத்தியக்கூறு மற்றும் அப்போதைய சூழலின் அடிப்படையில் அணுகும் திறனாளர்கள்… 

சித்தாந்தத்திற்காகப் போராடுவதை விட நியாயத்திற்காகக் கொடியேந்தும் போராளிகள். 

சித்தாந்தம், பகுத்தறிவுத் திறனைக் கட்டுப்படுத்துகிறது என்று அவர்கள் நம்புவதால், மய்யவாத நம்பிக்கை சித்தாந்தத்தால் வரையறுக்கப்படவில்லை. நடைமுறை யதார்த்தம் மற்றும் சூழ்நிலையை அடிப்படையாகக் கொண்ட பகுத்தறிவை நம்பி வரையறுக்கப்பட்டது தான் மய்யவாதம். 

இரண்டு, எதிரெதிர் துருவங்கள் தங்கள் சுய நிரல்களிலும் சித்தாந்தங்களிலும் தொடர்ந்து ஈடுபடுவதை விட, உண்மைகளைக் கையாண்டு, ஒன்றாகச் செயல்படுவதில் கவனம் செலுத்தினால், பல சிக்கல்களைச் சரி செய்ய முடியும் என்பது மய்யவாதிகளின் நம்பிக்கை.

மய்யவாதம் என்பது, ஏற்றுக்கொள்ளப்பட்டப் புகழ்பெற்றவற்றை செய்வதல்ல. மய்யவாதம் என்பது, எது சரியோ அதை செய்வது.